Tolosaldeko Hitza

Hiru urtez indartzen

Leitza ðð Gazte talde bat bizikleta martxan ibili zen, Atekabeltz Gaztetxearen 3. urteurrena ospatzeko. Jokuak ere izan ziren.

NEREA URBIZU

Atekabetz Gaztetxeak urtez urte autogestioaz sortzen-eraikitzen leloa aukeratu du bere hirugarren urtemugan. Gaztetxeak merezi bezala, bertakoek dotoretu egin zuten asteazkenean eraikina, kolore biziekin apainduz. Ez zen gutxiagorako, hiru urte egin baititu Gaztetxeak. Honen baitan egitarau bat prestatu zuten gazteek, eta 10:00etarako han ziren lehen goiztiarrak, Gaztetxean, bizikleta eta guzti, hauekin martxa herrian zehar egiteko. 25 bizikleta inguru atera ziren eta herriaren baitan ibili ziren.

AHTri buruzko hitzaldi bat ere izan zuten, hasiera batean goizean izan behar zuen baina beranduago izan zen azkenean. Bitartean, txalaparta jotzen, musika entzuten eta dantzatzen jardun ziren leitzarrak bazkariaren ordura arte.

Bazkari osteko tertulia ederki luzatu ostean, 18:00ak aldera plazan jokuak egin zituzten, eta 18:30erako Elektrotuna azaldu zen Karrapen, jolasak egiten ari ziren lekuan. Hortaz, jolasteari utzi, eta han aritu ziren gero dantzan Elektrotunaren laguntzaz.

Gauari lekukoa Vendetta ska talde berriak pasa zion. Leitzarrak ez zirenak ere azaldu ziren bertan, kontzertuaz eta dantzaz gozatzera. Eguraldia lagun, egun biribila izan zuten, beraz, Leitzako gazteek, Gaztetxearen III. urteurrena ospatzeko.